O tradicional chipirón nunha versión actual

Chef:
Pepe Solla
Restaurante:
Casa Solla

Ingredientes:

2 chipiróns.

Aceite de ceboliño:

Ceboliño.
Aceite virxe.

Puré de cebola:

2 cebolas.
Manteiga.

Cebola escura:

2 cebolas.
1 decilitro de soia.
10 gramos de azucre moreno.


Elaboración do chipirón:

Escoller un chipirón de bo tamaño e moi fresco, limpalo cuidadosamente do seu interior e a pel exterior, separar a cabeza e cortar o corpo en tiras, reservar.

Elaboración do aceite de ceboliño:

Picamos o ceboliño e cubrimos co aceite.

Elaboración do puré de cebola:

Limpamos e troceamos a cebola, poñemos a lume moi suave cun pouco de aceite e auga e deixamos facer sen que tome cor, escurremos e trituramos cun pouco de manteiga, damos punto de sal e coamos.

Elaboración da cebola escura:

Limpamos e troceamos a cebola, poñemos na tixola cun chorro de aceite damos cor a base de lume forte, remollamos coa soia e o azucre e deixamos facer.

Acabado e presentación:

Marcamos o chipirón lixeiramente na prancha moi quente, montamos marcando un trazo de puré de cebola, un pouco de cebola escura, sobre esta o chipirón e por último un chorriño de aceite de ceboliño.